जातपूजाक अतिरिक्त सेहो समय समयपर डिहबार थानक प्राङ्गणमे अष्टयाम, रामायण पाठ, रामनाम जप, भजन-किर्तन इत्यादि भव्यताक सङ्ग कएल जाइत अइछ । खासकए दशमीक घटस्थापनाक दिनसँ निरन्तर रुपमे सन्ध्याकाल ग्रामिण किर्तनीया मण्डलीद्वारा भजन किर्तन कए गाम घुमबाक परम्परा रहल अइछ । दशमीक १० दिनधरि डिहबार थान आऽ गाममे राम(चमार) जातिक व्यक्तिद्वारा ढोल बजाओल जेबाक परम्परा पुस्तैनी चलैत आबि रहल छल । मुदा विगत डेढ दशक एम्हर शनैः शनैः ई परम्परा बन्द जँका भऽ गेल अइछ । एकर कारक तत्वक रुपमे जातीय विभेद एवम् सामाजिक उत्पीडनसहित बहुतरासऽ कारण सभ सेहो जिम्मेवार अइछ ।
दशमीक अतिरिक्त दीपावली, फगुआ (होरी), रामनवमी सहित अन्य पावनि त्योहार एवम् अनुष्ठानक अवसरमे सेहो डिहबार थानमे धार्मिक अनुष्ठान सभ होइत रहैत छैक । डिहबार अर्थात राजाजी थानमे जा कए कबुला कएलापर पूणर् होयवाक जनविश्वास रहल अइछ । कबुला पूणर् भेलाक बाद डिहवार थानमे लड्डु, खीर, पान, सुपारी, घोडकलेश (माटिक घोडा), झाँप, चनमा आदी चढाओल जाइत अइछ । डिहबार थानमे नियमित पूजा-आजाकलेल थानपति अर्थात पूजारी सेहो राखल जाइत अइछ वा जातपूजा (अखाड्ही पूजा) सहित विशेष अनुष्ठानक अगुवाइ करए लेल गामेक एकगोटाके जिम्मा देल जाइत अइछ । गामक महिलासभ कोनो पावनि (व्रत) लेलापर वा विशेष अवसरसभमे डिहबार थानमे साँझ देवाक (दीप प्रज्जवलन) अनिवार्यता रहल अइछ ।
भारतीय संस्कृतिविद् आशुतोष भट्टाचार्यक अनुसार ग्राम देवतामे व्यक्तिगत उपासना मात्र नहि सामुदायिक जनजीवन आ उपासना तत्व सेहो निहित होइत छैक । मिथिलाक लोकजीवनमे देवीदेवतासऽ बेसी ग्रामिण जनजीवनमे डिहबारप्रति अगाध आस्था रहैत आबिरहल अइछ ।
तहिना इतिहास एवम् संस्कृतिविद् प्रा. डा. पीताम्बरलाल यादवक कथनानुसार ग्राम देवता डिहबारप्रतिक आस्था हिन्दू धर्मक एकटा अद्भूत आधार स्तम्भ मानल गेल अइछ । मानव सभ्यताक विकास क्रमसँगे स्वस्फूर्त रुपमे एकर विकास होइत आबि रहल अइछ । इतिहासमे उल्लेख भेल तथ्य अनुसार पहिने छोटछोट राज आ तक राजा होइत छल । ओ राजासभ जनतापर शासन मात्र नइँ आपतविपतमे रक्षा सेहो करैत छल । नेपालमे १४हम् शताब्दीदिस सिम्रौनगढक पतन पश्चात माण्डलिक राज्यसभ कायम भेल छल ।
प्रा. डा. यादवक अनुसार माण्डलिक राजासभ जनताक दुःख-पीडामे साथ दैत छल । एक-आपसमे द्वन्द्व अर्थात शक्तिक दम्भके कारणे भेल भिडन्तक क्रममे राजा सभक अन्त्य भेल । यद्यपी ग्रामिण जनजीवनमे राजाप्रतिक आस्था रहलाक कारणे राजाके अन्त्य भेलाक बादो तात्कालिन प्रजाप्रेमी राजाप्रतिक आस्था एखनो ग्राम्यजीवनमे विद्यमान अइछ । जकर पुष्टी राजा सलहेश, कृष्णाराम, लोरिक, दीनाभद्री, कारिख महाराज, गोबिन्द गणिनाथ, धर्मराज आदी लोकनायक सभक पींडी बनाकए पूजा-आजा करवाक परम्परा मिथिला क्षेत्रमे कायम रहैत आएल अइछ ।
समग्रमे मिथिलाक हिन्दू समुदायकेंं धार्मिक आस्थाक प्रमुख केन्द्र डिहबार छियैक से कहएमे कोनो सन्देह नहि अइछ । लोकआस्था एवम् विश्वासक कारणें जन-जनमे राजा डिहबारप्रतिक आस्था कायम रहैत आएल अइछ । ई एतेक मजबूत अइछ जे बढैत आधुनिकताक बसातके एखनोधरि कोनो प्रभाव नहि परल अइछ । हिन्दूधर्मक निभपर टिकल अटूट राजाजी अर्थात डिहबारप्रतिक आस्था निरन्तर चलैत आइब रहल अइछ । संस्कृति, सभ्यता संस्कार एवम् आस्थाक धरोहर डिहबारके राजाजीक रुपमे पूजन युगयुगान्तरधरि चलैत रहत से कहवामे कोनो दुविधा नहि अइछ ।
(लेखक, भाषा, साहित्य, कला,संस्कृति, इतिहास एवम् समाजक समसामयिक विषयके लेखनमे सक्रिय छइथ । सं.)