सिरहा, ९ माघ: लहान स्थित कृषि सामग्री कम्पनी लिमिटेडक गोदाममे रासायनिक खाद उपलब्ध होइतो, स्थानीय किसानसभकेँ मल नै भेट सकल अइछ।
मधेश प्रदेश भूमि व्यवस्था, कृषि आ सहकारी मंत्रालयद्वारा स्थानीय तहकेँ वितरण होएबला खादके विवरणा स्पष्ट नै होएबाक कारणेँ किसानसभ खादसँ वंचित बनल अइछ । कृषि सामग्री कम्पनी लिमिटेड लहानके शाखा प्रबंधक दीपराज पौडेल कहैत छैथ जे मधेश प्रदेश भूमि व्यवस्था, कृषि आ सहकारी मंत्रालयसँ स्थानीय तहकेँ वितरण होएबला मलके संख्या स्पष्ट नै देल गेलाक कारणेँ रासायनिक खाद वितरणमे देरी भ रहल अइछ।
“प्रदेश सरकारद्वारा जमीनके क्षेत्रफलके आधारपर सम्बन्धित मंत्रालयद्वारा स्थानीय तहकेँ मल वितरणके मात्रा लिइखके पठेबाक चाही,” ओ कहलैन, “मंत्रालयसँ पत्र आबैमे देरी भेलाक कारण समस्या उत्पन्न भेल अइछ। पत्र प्राप्त होइते मल वितरणके प्रक्रिया आगू बढ़ाएल जाएत।” लहान स्थित कृषि सामग्री कम्पनी कोशी प्रदेशक खोटांग, ओखलढुंगा, सोलु आ मधेश प्रदेशक सिरहा जिला सभमे रासायनिक मल वितरण करैत अइछ।
प्रबंधक पौडेलक अनुसार, कोशी प्रदेशक जिलासभकेँ पठबैबला मलके संख्या उल्लेख क पठा देल गेल अइछ, जकरा कारण कोशी प्रदेशक ओहि जिलासभमे माघ महिनाक पहिल सप्ताहमे मल वितरण भ गेल छै। प्रक्रियागत त्रुटिक कारणेँ गहुँममे रासायनिक मल छिटैबला ‘पिक’ समय होइतो, किसानसभ मल नै पाइब रहल छैथ। तेँ लहानके गोदाममे वर्तमानमे पाँच सओ मेट्रिक टन डिएपी आ सात सओ मेट्रिक टन युरिया मल उपलब्ध अइछ। रासस
