जनकपुरधाम, १२ माघ: धनुषाक कमला नदीसँ भ रहल अवैध खननके रोकथाम लेल जिला प्रहरी कार्यालय कड़ा डेग उठा रहल अइछ।
दीर्घकालसँ नदीसँ गिट्टी, बालुवा आदि अवैध रूपसँ खनन क परिवहन क रहल मार्गसभकेँ खुनिके बन्द करबाक, निगरानी बढ़ेबाक, आ खननमे संलग्न ट्रैक्टर आ उपकरणकेँ नियन्त्रणमे लेबाक काजमे प्रहरी सक्रियता देखाइब रहल अइछ। प्रहरी सक्रियताक बढ़ैत प्रभावसँ अवैध खनन बहुत हदधैर रोकल गेल अइछ। ढल्केवर इलाका प्रहरी कार्यालयक निरीक्षक जटाशंकर यादव जानकारी देलैन जे अवैध खननमे प्रयोग होएबला ट्रैक्टर आ उपकरणकेँ पकैड़ क सम्बन्धित निकायमे पठाओल जा रहल अइछ। यादव कहलैन जे जरिवाना लगाओलाक बावजूद अवैध खनन बन्द नै भेल छल। ताहि लेल वैकल्पिक मार्गसभकेँ बन्द करबाक पहलसँ खनन रोकल गेल अइछ। मिथिला आ गणेशमान चारनाथ नगरपालिका क्षेत्रभितर पड़ैबला कमला नदीक अवैध खनन रोकबाक लेल प्रहरी परिचालन आ निगरानी बढ़ाओलाक परिणामस्वरूप खनन नियन्त्रणमे आइब गेल अइछ, एहन दावा गणेशमानक नगर प्रमुख जीतनारायण यादव केलैन। ओ कहलैन जे आन्तरिक समस्या कारण ई वर्ष ठेक्का नै लाइग सकल, जे कारण अवैध खनन अत्यधिक भ रहल छलै।
नगर प्रमुख यादव जानकारी देलैन जे स्थानीय स्तरपर अवैध रूपसँ कार्यरत आ बिना नवीकरणके क्रशर उद्योगसभ सेहो बन्द कराओल गेल अइछ। एखन अवैध खनन रोकबाक लेल जिला प्रशासन कार्यालयसँ सेहो सहकार्य करबाक मांग कएल गेल अइछ। धनुषाक उत्तरी क्षेत्रमे जलाद, औरही, बडाहरी, रातु आ कमला नदीसँ होएबला अवैध खनन रोकबाक लेल स्थानीय प्रशासन आ प्रहरीक लेल चुनौती अइछ। राइतक समयमे टिपर आ ट्रैक्टरक प्रयोगसँ गुप्त रूपमे खनन करबाक किछ घटनासभ भेल अइछ। स्थानीय लोक प्रशासनसँ सहजीकरण करबाक मांग क रहल छैथ।
