काठमाण्डू, १८ पुसः निर्वाचन आयोग अगिला फागुन २१ गतेके लेल निर्धारण कएल गेल प्रतिनिधि सभा सदस्य निर्वाचनक आवश्यक सामग्री ढुवानीके लेल सम्बद्ध पक्षकेँ आग्रह केलक अइछ ।
निर्वाचनमे प्रयोग होएबला निर्वाचन सामग्री ढुवानीके लेल हेलिकप्टर, ट्रक, कन्टेनर प्रयोग कएल जाएत । ढुवानीके लेल कुरियर सेवा संचालन करैबला फर्म या कम्पनीकेँ सूचीकृत होबए आबै लेल आयोग आग्रह केलक अइछ ।
आयोगद्वारा सूचीकृत होबाक लेल इच्छुक फर्म या कम्पनीकेँ आवश्यक शर्त पूरा क आवेदन देबाक लेल कहल गेल अइछ । सम्बन्धित निकायसँ सेवा संचालन करबाक लेल प्राप्त कएने इजाजतपत्र, मूल्यअभिवृद्धिकर दर्ता प्रमाणपत्र आ आर्थिक वर्ष २०८१/८२ धैरके करचुक्ता प्रमाणपत्र आ बितल तीन आर्थिक वर्षके कारोबार विवरण प्रष्ट भेल प्रमाणपत्रके प्रतिलिपि पेस करबाक लेल आयोगद्वारा आग्रह कएल गेल अइछ ।
हेलिकप्टर भाड़ामे लेबाक लेल बितल तीन आर्थिक वर्षके न्यूनतम औसत वार्षिक कारोबार रकम तीन करोड़ टका बराबरके होबए पड़त । ट्रक तथा कन्टेनर भाड़ामे देबैबलाके एक करोड़ आ कुरियर सेवाके लेल ३० लाख टका बराबरके कारोबारके विवरण पेस करए पड़त ।
कुरियर सेवा प्रदान करबाक लेल इच्छुक कम्पनीके अपन कुरियरके कार्यालय आ प्रतिनिधि ७७ जिलामे भेल टेलिफोन, मोबाइल नम्बरबसहितक विवरण निवेदनसहित पेस करए पड़त ।
एकसँ बेसी समूहमे सूचीकृत होबएजँका निवेदन देलापर ओहन निवेदनपर कारबाही नै करबाक आयोग जनौलक अइछ । सेवा प्रदायक फर्म या कम्पनी सूचीकृत करब या नै करब से सम्पूर्ण अधिकार आयोगमे निहित रहत । रासस
