काठमाण्डू, २५ अखारः प्रधानमन्त्री वालेन्द्र शाह निर्माण क्षेत्रक समस्या, एकर प्रवर्द्धन, भौतिक पूर्वाधार विकास, लगानी वातावरण तथा आर्थिक सुधारक सम्बन्धमे आइ निर्माण– व्यवसायीसँ परामर्श केलैन अइछ ।
प्रधानमन्त्री तथा मन्त्रिपरिषद कार्यालयमे नेपाल निर्माण व्यवसायी महासङ्घक पदाधिकारीसँ भेल परामर्शमे प्रधानमन्त्री शाह निर्माण क्षेत्र देशक आर्थिक विकास, रोजगारी सिर्जना आ पूर्वाधार निर्माणक महत्वपूर्ण आधार भेल उल्लेख करैत अइ क्षेत्रक समस्याके समाधानक लेल सरकार सकारात्मक रहल बतौलैन ।
प्रधानमन्त्री शाह निर्माण व्यवसायकेँ मर्यादित, पारदर्शी, जिमेवार आ परिणाममुखी बनाबैत विकास–निर्माणक काजकेँ निर्धारित समयमे सम्पन्न करबाक लेल सब पक्षके सक्रिय सहकार्य आवश्यक भेल तइपर जोड़ देलैन ।
परामर्शमे नेपाल निर्माण व्यवसायी महासङ्घक अध्यक्ष निकोलश पाण्डे, वरिष्ठ उपाध्यक्ष मुकेश पन्त, महासचिव शिवहरि घिमिरे, बागमती प्रदेशक उपाध्यक्ष बालकृष्ण थापा तथा महासङ्घका पूर्वअध्यक्ष एवं सल्लाहकार जयराम लामिछाने सहभागी छलैथ ।
ओसभ निर्माण क्षेत्र भोगैत आएल भुक्तानी, म्याद थप, ठेक्का व्यवस्थापन, समयमे आयोजना कार्यावंयन, मूल्य समायोजन, बैंकिङ तथा लगानीसम्बन्धी चुनौतीके बारेमे प्रधानमन्त्री शाहकेँ जानकारी करोलैन । तहिना, निर्माण उद्योगकेँ चलायमान बनेबाक लेल सरकार आ निजी क्षेत्र बीचक सहकार्यकेँ आओर प्रभावकारी बनेबाक आवश्यक भेल बतौलैन ।
परामर्शमे प्रधानमन्त्री तथा मन्त्रिपरिषद कार्यालयके प्रमुख सल्लाहकार कुमार व्यञ्जनकार, सूचना तथा सञ्चार प्रविधि सल्लाहकार विवेक मिश्र तथा प्रमुख स्वकीय सचिव सुवास शर्मा सहभागी छलैथ । (रासस)
