महोत्तरी, २१ जेठः बितल पाँच दिनसँ अत्यधिक गर्मी बढ़लाक बाद महोत्तरीके बर्दिबास नगरपालिका नगर क्षेत्रक सब विद्यालय दू दिन बन्द करबाक निर्णय केलक अइछ ।
अत्यधिक गर्मीके कारण बालबालिकाके स्वास्थ्यमे जोखिम बढ़बाक सम्भावना भेलासँ आइ आ काइल (वृहस्पैतदिन आ शुक्रदिन) दू दिन नगरक्षेत्रक सामुदायिक, संस्थागत आ धार्मिक विद्यालयसभ पूर्ण रूपमे बन्द करबाक निर्णय कएल गेल पालिकाके प्रमुख प्रशासकीय अधिकृत राममणि अधिकारी जानकारी देलैन ।
बर्दिबास जिलामे सबसँ बेसी विद्यालय भेल स्थानीय तह अइछ । अइ ठाम ५५ टा सामुदायिक आ अन्य संस्थागत तथा धार्मिकसहित ८० सँ बेसी विद्यालय अइछ ।
जिलामे बितल शैनदिनसँ अत्यधिक गर्मी बढ़ल अइछ । शैनदिनसँ दुपहरक समयमे ३८ डिग्री सेल्सियस लगपास तापक्रम मापन कएल गेल अइछ । बितल रैबदिन जिलाक गौशाला–१२ कान्तिबजारस्थित राष्ट्रिय माध्यमिक विद्यालयमे १० गोटे विद्यार्थी क्लासमे बेहोस भेल छल । इलाजक बाद सब विद्यार्थी स्वस्थ भ चुकल अइछ ।
गर्मीके कारण हाटबजार आ कार्यालयसभमे सेहो भिड़भाड़ कम भेल अइछ । गर्मीके कारण विद्यालय जाएबला बालबालिका, वृद्धवृद्धा, गर्भवती महिला, परसौती आ दैनिक मजदुरी करैबलासभ बेसी समस्यामे अइछ । (रासस)
