काठमाण्डू, १५ पुसः अइगला फागुन २१ गतेके लेल निर्धारण कएल गेल प्रतिनिधि सभा सदस्य निर्वाचनमे उम्मेदवारद्वारा कएल जाएबला खर्चके सीमा निर्धारण कएल गेल अइछ । निर्वाचन आयोग सुविधासम्पन्न मानल गेल जिलाके हकमे आ विकट मानल गेल जिलाके हकमे अलग-अलग खर्च सीमा निर्धारण केलक अइछ ।
आयोगक अनुसार काठमाण्डूके पाँचटा निर्वाचन क्षेत्रके उम्मेदवारसभ बेसीमे २५ लाख टका खर्च क सकत । जइमे काठमाण्डू क्षेत्र नं. १, ३, ६, ७ आ ८ अइछ । तहिना, १७ टा निर्वाचन क्षेत्रके उम्मेदवार बेसीमे २७ लाख टका खर्च क सकबाक सीमा निर्धारण कएल गेल अइछ ।
तहिना, ६५ टा निर्वाचन क्षेत्रक उम्मेदवार बेसीमे २९ लाख टका खर्च क सकत । आयोगक अनुसार ५२ टा निर्वाचन क्षेत्रके उम्मेदवार बेसीमे ३१ लाख टका, २६ टा निर्वाचन क्षेत्रक उम्मेदवार बेसीमे ३३ लाख टका खर्च क सकबाक सीमा निर्धारण कएल गेल आयोगक प्रवक्ता नारायण प्रसाद भट्टराई जानकारी देलैन ।
हुनक कहब अनुसार उम्मेदवारके खर्च करैत समय बैंक या वित्तीय संस्थामे अलग खाता संचालन क ओएह खातासँ खर्च करए पड़त । खर्च करैत समय निजके दिससँ खर्च करैबला जिमेवार अधिकारी निर्धारण क ओकर नामसहितक विवरण निर्वाचन अधिकृतके कार्यालयमे पेस करए पड़त ।
उम्मेदवारसभकेँ निर्धारण कएल गेल खर्चके सीमा भीतर रहि निर्वाचन खर्च करए आ प्रतिनिधि सभा सदस्य ऐनबमोजिम निर्वाचन खर्चके विवरण निर्वाचन परिणाम घोषणा भेल मितिसँ ३५ दिन भीतर निर्वाचन कार्यालयमे पेस करए पड़त । (रासस)
