काठमाण्डू, २ कातिक : नवरात्रके ९म दिन आइ काठमाण्डू उपत्यकालगायत देशक विभिन्न भागमे अवस्थित शक्तिपीठ एवं देवी मन्दिरमे भक्तजनके भीड़ लागल अइछ ।
तिथि बढ़लाक कारण आइ सेहो महाअष्टमी माइन क अइ ठामक गुह्येश्वरी, मैतीदेवी, कालिकास्थान, नक्साल भगवती, भद्रकाली, शोभा भगवती, विजेश्वरी, इन्द्रायणी, रक्तकाली, श्वेतकाली, चामुण्डामाई, सुन्दरीमाई, बज्रयोगिनी, तलेजु भवानी, टोखा चण्डेश्वरीलगायत शक्तिपीठ एवं देवी मन्दिरमे पूजापाठ करैबला भक्तजनके भीड़ लागल अइछ । शक्तिपीठ तथा देवी मन्दिर सजाएल गेल अइछ ।
रासस स्थानीय समाचारदातासभक अनुसार काठमाण्डू उपत्यका लगके दक्षिणकाली, गोरखाके मनकामना, ताप्लेजुङके पाथीभरा, ललितपुरके बंगलामुखी, पोखराके विन्ध्यवासिनी, काभ्रेपलाञ्चोकके पलाञ्चोक भगवती, जुम्लाके चन्दननाथ, डोटीके शैलेश्वरी, डडेलधुराके उग्रतारा भगवती, बैतडीके त्रिपुरासुन्दरी, नेपालगञ्जके वागीश्वरी, सप्तरीके छिन्नमस्ता भगवती आ राजदेवी, धनुषाके राजदेवी, धनकुटाके जाल्पादेवी, धरानके दन्तकाली तथा बाराके गढीमाईमे भोरेसँ भक्तजनके भीड़ लागल अइछ ।
शारदीय नवरात्र सेहो कहल जाएबला अइ दशमीमे अवसरमे शक्तिपीठमे दर्शन कएलापर मनोकामना पूरा होबाक धार्मिक विश्वास अइछ । यइ अवसरमे महाकाली, महालक्ष्मी आ महासरस्वतीके सेहो विशेष रुपमे पूजापाठ कएल जाइत अइछ । (रासस)
