जनकपुरधाम, १० अगहनः मधेश प्रदेशक मुख्यमन्त्री सरोज कुमार यादव प्रदेशमे स्नातक उत्तीर्ण कएल बेरोजगार युवाकेँ मासिक बेरोजगार भत्ता देबाक निर्णय कएल गेल जानकारी देलैन अइछ ।
प्रथम मन्त्रिपरिषद् बैसारके निर्णय आइ पत्रकार सम्मेलनमार्फत सार्वजनिक करैत ओ प्रदेशमे स्नातक उत्तीर्ण कएल बेरोजगार युवाकेँ मासिक टका दू हजारके दरसँ बेरोजगार भत्ता देबाक निर्णय कएल गेल बतौलैन ।
प्रदेश सरकार १८ वर्षसँ ३५ वर्ष उमेर तकके स्नातक उत्तीर्ण क कोनो रोजगारमे नै रहल युवाकेँ जीवन निर्वाह बापत मासिक टका दू हजारके दरसँ भत्ता उपलब्ध करेबाक निर्णय केलक अइछ । प्रदेशमे स्नातक उत्तीर्ण कएल करिब एक लाख ५० हजार बेरोजगार युवा छैथ ।
बैसारमे सरकार रौदी आ डुबानसँ धानबालीमे क्षति भेनिहार किसानकेँ प्रतिकट्ठा टका एक हजार ५०० क दर राहत उपलब्ध करेबाक निर्णय भेल अइछ ।
किसानकेँ राहतमे ३६ करोड़ टका आ युवाकेँ बेरोजगार भत्तामे ३५ करोड़ खर्च होबाक अनुमान कएल गेल मुख्यमन्त्री यादव जानकारी देलैन । किसानकेँ राहतस्वरूप एक हजार ५०० टका प्रतिकट्ठा राहतस्वरूप उपलब्ध करेबाक प्रक्रियामे रहल ओ बतौलैन ।
अइ साल रौदीके चपेटामे पड़ल मधेश प्रदेशक किसानसभ बितल आसिनके अविरल वर्षासँ पुनःडुबानसँ पीडित भेल छल । मनसुन अवधिमे लम्बा समय रौदी पड़लाक बाद प्रदेश सरकार मधेश प्रदेशकेँ सुक्खाग्रस्त क्षेत्र घोषणा कएने छल । (रासस)
